POCO X8 Pro Max實測：打機好手 8500mAh電量夠頂兩日！

ASUS收檔唔玩，遊戲手機買少見少，好彩仲有小米POCO撐住。呢個向來標榜「違反市場學」的高性價比牌子，最新推出X8 Pro Max，賣街價三千零蚊，但就塞咗粒3nm天璣9500s同8500mAh巨無霸電入去，擺明車馬想接收班無碇走嘅電競玩家！以下就同大家實測一番！

外型：金屬邊框加RGB燈

今次POCO擺脫以往嗰種膠味濃嘅感覺，用咗金屬中框配玻璃纖維機背，218g重量揸上手好鬼紮實。最搶眼係機背鏡頭模組嗰兩條「跑道仔」，藏咗組Dynamic RGB燈效，支援多色自訂，聽歌、打機、充電都會閃吓閃吓。雖然邊位方正直角，握得緊會有少少𠝹手，但整體質感對得住呢個價。

屏幕：陽光下都睇到敵人

佢用咗塊6.83吋1.5K AMOLED芒，峰值亮度癲到3500nit，烈日當空打機都仲見到敵人喺邊。120Hz刷新率、3840Hz PWM高頻調光，仲有德國萊茵三重護眼認證，長時間捱夜打機都冇咁易眼攰。

效能：跑分直逼旗艦 散熱交足功課

講到核心，X8 Pro Max全球首發MTK天璣9500s處理器，3nm製程加「4+4」全大核架構，Antutu跑分輕鬆突破280萬，有測試甚至直逼300萬大關。實測《崩壞》開盡特效，配合WildBoost優化技術，可以穩定keep住60fps，流暢度拍得住上代旗艦。

驚佢發滾？廠方落重本加大5800mm² 3D IceLoop循環冷卻系統，實測連續捱兩粒鐘機，機身都只係微暖，冇出現「焗桑拿」情況，SoC溫度有效降低3°C，確保打機唔會因過熱降頻。

續航：電量怪獸級 兩日唔叉都得

全機最大賣點一定係嗰粒8500mAh硅碳負極電池，POCO史上最大電量。官方話連續播4K片可達10個鐘以上。實測打機成粒鐘，用電量跌10%；連續睇YouTube片到10個鐘仲剩返30%電。換算一般生活應用，叉滿電用足兩日絕對冇問題。

充電方面支援100W有線快充，實測24分鐘可由0%叉到50%。最實用係首度加入27W有線反向充電，可以幫朋友部電話或者耳機應急，變身「流動尿袋」。

相機：主鏡交足功課 遠拍能力一般

影相一向唔係POCO強項，今次都唔例外。主鏡用咗5000萬像素Light Fusion 600感光元件，f/1.5大光圈加OIS光學防震，日拍成像自然細緻。UltraSnap快拍功能連拍可達120張，動態捕捉表現唔錯。但隔籬嗰粒800萬像素超廣角，放大就有少少鬆散。長拍欠缺長焦鏡幫手，主鏡最多支2倍無損變焦及10倍數碼變焦重，同真正影相旗艦仲有距離。

試相一覽：

系統：HyperOS 3加AI功能

預載Xiaomi HyperOS 3，支援Google嘅Circle to Search圈選搜尋。特別一提係「小米離線通訊」功能，可在無網絡環境下，讓兩部手機在500米內實現語音通話，露營或收得差嘅地方用得著。另外支援eSIM同雙卡（其中一個可選nano SIM或eSIM），旅行買數據卡方便好多。

總結：三千零蚊收購ASUS玩家

POCO X8 Pro Max擺到明將成本花喺性能、屏幕、續航呢啲「殺手級」賣點，雖然相機妥協，又冇無線充電，但對於追求長氣效能嘅精打玩家，三千零蚊有咁嘅表現，絕對係華碩退出後嘅最佳替代品。

同場加映：Iron Man限定版

POCO再度與Marvel合作，推出POCO X8 Pro Iron Man限定版。靈感源自史達工業（Stark Industry）其中一套最強大且標誌性的黑金戰甲，機身用上型格黑色，綴以閃爍金色條紋，閃光燈則化身為核心的弧形反應堆。硬件以外，全新訂製的鐵甲奇俠主題介面將黑金美學融入每一次互動。當裝置啟動，鐵甲奇俠隨之甦醒，為用戶帶來沉浸式的科幻體驗。

POCO X8 Pro Max連同平價版X8 Pro及X8 Pro Iron Man限定版即日起於小米官網（ mi.com/hk ）及Fortress豐澤網店正式開售，詳情及優惠如下：