Oppo Reno15 Pro Max評測：中階黑馬只爭一點就完美？

3天前
讀畢需時 2 分鐘

2億像素（200MP）手機在香港市場的價格跨度相當大，平可以兩三千蚊有交易，但處理能力有限，副鏡頭又相對雞肋；貴則要八九千蚊甚至上萬元，鏡頭、屏幕、處理器都係最勁，但致命傷係「貴」。OPPO新推出的Reno15 Pro Max 5G定價介乎兩者之間，有2億像素鏡頭的同時，其他規格都唔弱，究竟值唔值得入手，即刻測試一下！

先講影相，Reno 15 Pro Max相當落本，直接用上一套相當奢華嘅三鏡組合：主鏡頭係2億像素（1/1.56"感光元件），配搭5000萬像素超廣角，仲有唔少中階機未必有嘅5000萬像素3.5X遠攝潛望鏡。齋睇牌面，由wide到tele都齊章，日常snap夠晒用。

實試主鏡頭，色彩還原度高班，日光日白之下，層次感分明，尤其係光影過渡自然，冇硬推 HDR嗰種味精感覺。至於超廣角鏡，質素同樣交足功課，邊位變形控制得比上代明顯有進步，放大100%睇，成像依然實淨，冇散修修，對於鍾意影建築物或者大景嘅用家嚟講，呢個位值得加分。

講到粒3.5X長焦，的確係呢個價位嘅「稀有物種」。實拍所見，細緻度同色彩表現都算可圈可點，測試喺50倍變焦下，條線都仲keep得住，冇話鬆到一pat嘢，影遠景好幫到手。

其他試相一覽：

此機另一好玩的地方是全新「彈出效果」功能，簡單嚟講在拼貼多張照片後，可以透過AI將部分位置拉出，營造出突破框框的特別效果，而且不限靜態圖片，動態照片一樣得，相當好玩！

講到外型，Reno 15 Pro Max有幾分iPhone感覺，連個相機模組都學足八九成。不過佢自己加咗啲嘢，例如成部機用上航太級鋁金合打造，手感細滑得嚟仲要唔跣手，最緊要係唔易痴手指模，呢點值得加分。機身用上6.78吋2772×1272解像度AMOLED窄邊框屏幕，支援 120Hz更新率，望落去光猛通透，可視角度仲要好高吓。仲要提一提，呢部機竟然拎埋IP69 防水防塵認證，兼且對應濕手觸控技術，呢啲細節位算係誠意十足。