Oppo Reno13 Pro實測：過年影相神器

農曆新年要外出拜年，影相機會自然特別多，新推出嘅輕旗艦手機Oppo Reno13 Pro擁有豐富的拍攝功能，而且影完仲有得AI執相，一於趁年假試試佢！

▲ Oppo Reno13 Pro (售價：HK$4,199)

國產手機愈出愈靚，呢部Reno13 Pro都唔例外，佢用咗鋁合金中框及一體式冷雕玻璃後蓋，堅固得來機背係光線下有波浪紋理，靚到成部藝術品咁。機身僅厚7.55mm，重197g，四角圓滑手感算係唔錯。另外佢四條邊框都只有1.6mm幼，令6.83吋OLED屏幕擁有93.8%極高屏佔比，同時支援1.5K解像度、120Hz刷新率和HDR10+認證，啱晒睇片。

▲ 開箱一覽，隨手機附有透明保護軟殻、Type-C連接線、三腳火牛及SIM卡針

此機最大賣點係影相，內置5,000萬像素OIS廣角主鏡、5,000萬像素潛望長焦、800萬像素超廣角及5,000萬像素前置鏡頭，其中主鏡搭載Sony IMX890感光元件與f/1.8大光圈，實測成像銳利細緻；潛望式長焦鏡頭則支援3.5倍光學變焦與120倍數位變焦，測試變焦至高倍數，畫質都未見下降。另外雖然它沒有專屬微距鏡，但近距離拍攝年花一樣無問題，細節度高且色彩濃郁，立體感十足。

▲ 搭載5,000萬像素OIS廣角主鏡、5,000萬像素潛望長焦、800萬像素超廣角鏡頭

▲ 主鏡頭拍攝色彩鮮艷，對比度高，相片看起來十分立體

▲ 雖沒有專屬微距鏡頭，但近距離影年花都好清，紋理活現

▲ 0.6x、1倍、7倍及30倍的焦距效果一覽，可見超廣角沒有畸變，Zoom In畫質也沒有下降

▲ 人像模式提供柔美、夢幻、朦朧三種不同程度的柔光濾鏡，影人份外有Feel

潮流興AI，此機亦玩埋一份，而且十分實用，例如可一鍵去除玻璃反光、消除手震引致的拖影、圈走路人甲及提升解像度等。最正係預載程式《AI Studio》，佢可以把任何人像相變成藝術肖像，而且有多種風格及角色選擇，好玩到停唔到手！

▲ AI消除反光: 針對隔窗拍攝等反光場景，一鍵 AI 辨識、去除玻璃反光，還原零阻礙的直視效果

▲ 實測AI消除反光功能，左為原相，右為修圖後，由玻璃反射的電視畫面幾近消失，但人的倒影仲係度，效果未算完美

▲ 可以消除途人，除了手動塗抹，仲可以交由系統智慧圈選

▲ 左圖為消除途人前，右圖為消除後，可見效果十分理想，完全不留痕跡

▲《AI Studio》可以把任何人像相變成藝術肖像，而且有多種風格及角色選擇

今時今日好多手機都防水，但好似呢部咁具有水中相機模式就少之又少。它通過IP68/IP69防塵防水認證，防熱水、防浸水及防噴水，可在1.5米水深中拍片影相長達30分鐘。一經開啟水中相機模式，音量鍵即變成影相及錄影掣，長按電源掣則可退出模式，並立刻進行排水，過程有點像Apple Watch。

效能方面，港版搭載MediaTek Dimensity 8350處理器、12GB RAM及512GB ROM，《AnTuTu》測試得出1,147,597分，反映效能達中上水平。電池則有5,800mAh，支援80W有線快充及50W無線快充。特別一提，此機具備Livephoto功能，可連接iPhone快速分享照片、影片、文件及Livephoto檔案，並支援一碰互傳，新年影埋咁多靚相，傳番畀親戚朋友話咁易！

▲《AnTuTu》測試得出1,147,597分，反映效能達中上水平

▲ 預裝Android 15及ColorOS 15.0 UI，512GB ROM版在安裝系統後，仍餘下481.1GB空間

▲ 提供「記憶體拓展」功能，可自行拓展記憶體容量，最多可提升12GB RAM