OPPO Find N5評測：可能係目前最好用嘅大摺手機﹖

今時今日摺屏手機唔係新鮮事，要突圍而出，就要攪攪新意思。早前推出的OPPO Find N5便擁有多個賣點，除咗係全球最薄「大摺」，竟然仲可以同iPhone與Mac機互通，玩法超創新，今次就等小編分享一星期用後感！

話明摺機，固有諗法一定又厚又重，呢部Find N5巔覆諗法，摺埋時只有8.93mm厚，比好多直板手機仲要薄，攤開時最薄處更只有4.21mm，認真誇張！手感方面，229g的機身平衡度造得很好，沒有上重下輕問題，配合微弧邊框算相當好拎，反而係機背有點滑手，想穩陣啲建議加番個專屬背蓋。

▲同兩蚊銀比，Find N5其實唔係厚好多

▲攤開時虛擬鍵盤被切成左右兩邊，方便雙手打字，相當細心

▲跟機送專屬機殻、USB-C線及火牛

Find N5攤開時的8.12吋內屏是大摺機中最大，實測無論輸出白位還是黑位，都幾乎睇唔到摺痕。另外時下許多手機的屏幕得個「鮮」字，初睇好靚，但長睇就覺得刺眼。此機相反，亮度、色溫調校得剛剛好，睇落好舒服，而且強光底下亦睇得清楚，沒有嚴重反光問題，用來睇片效果一流！

▲無論是顯示白位、黑位還是彩色內容，都完全睇唔到摺痕

▲畫面顏色自然飽和，亮度適中唔刺眼，叫人睇得舒服

▲較可惜是對比度唔算高，黑位呈現未算出色

▲善用大屏幕，可同時左右開弓

▲設有6.62吋外屏幕，並以20.7:9長條比例顯示

▲可以調校色彩模式及色溫

Find N5仲有個特異功能，以往用Android機要與「封閉」的iPhone傳相可謂十分困難，呢部機就無呢個問題，只要iPhone安裝《O+互聯》app，就可以同Find N5快速互傳檔案，成功配對後一秒傳相，速度同AirDrop無咩分別！

▲可把相片秒速Send至iPhone

▲也可以從iPhone接收相片，速度有AirDrop咁快

▲發送相片示範

▲接收相片示範

除了iPhone，它連Mac機都連到，同樣要先係Mac機安裝《O+互聯》程式，之後就可經電腦瀏覽Find N5的檔案內容，互傳檔案甚至可以作「遠端控制」，用Find N5屏幕遙距操控Mac機，並提供虛擬鍵盤、Mouse及Trackpad，令手機變成一部迷你電腦，玩法實用創新連Apple自己都無得咁玩！

▲可跟Mac機互傳檔案甚至遠端操作電腦

▲遠端操作電腦時有虛擬鍵盤使用

▲提供虛擬Trackpad

▲連Magic Mouse都畀埋你，並可按住滾動網頁

▲仲可以調校畫面清晰度

▲遠端控制Mac機示範

再試埋影相實力，搭載哈蘇鏡頭系統，後鏡三組合是50MP廣角、50MP長焦及8MP超廣角，前鏡頭則有8MP，而且內外屏同時搭載。另外它加入了《AI Studio》，可生成百變人像及改變圖像風格，後者撳個掣就可把相片變成吉卜力或美漫風格，效果有趣。

▲三鏡頭哈蘇相機系統

▲透過《AI Studio》，可以Cos成不同角色，相當好玩

▲換裝後效果都幾搞笑

▲另可把相片變成不同風格，日漫是其中之一

▲唔使畀錢ChatGPT，就玩到吉卜力畫風

▲變成美漫亦得，得咗！

作為旗艦機，它用的是目前最強Snapdragon 8 Elite處理器，內置16GB RAM及512GB ROM，《Antutu》測試接近180萬分，反映性能優異。至於電池，內建5,600mAh電池，支援80W有線及50W無線快充，實測「慳慳哋」夠用兩日，大摺機來說算十分慳電。

▲搭載Snapdragon 8 Elite處理器、16GB RAM及512GB ROM

▲預載ColorOS 15系統

▲《Antutu》測試接近180分，反映性能優異

▲支援AI摘要、AI 語音與AI寫作等一系列高級工具

總結：創意實用兼備

小編以往用過唔少摺機，初上手好驚喜，但用耐咗就發覺屏幕有痕，結果用外屏幕多過內摺屏，而且機身太重，最後都是棄用。相反，呢部OPPO Find N5給我的感覺好唔同，首先佢輕同薄，屏幕幾乎無痕而且睇得舒服，基本上令人好樂意拎出街用。其次是它支援iPhone互傳及Mac機操控，手機變成Mini PC，呢個功能就連Apple自己都無。整體而言，它創意、實用兼備，有可能是目前市場最好用的大摺手機之一，唯一問題係售價高達HK$11,999，超出咗唔少人嘅預算呢！