HTC VIVE Eagle實測︰真正戴得出街嘅智能眼鏡 仲要開句聲即影相翻譯﹖

HTC好耐無係香港推出新產品，等咗咁耐最近終於有新嘢玩，它就是品旗下首款AI 眼鏡VIVE Eagle。眼鏡大走Hi-Fashion路線，重量與設計皆為亞洲人而設，仲支援一系列語音操控功能，究竟實際玩落係點﹖即睇！

坊間唔少智能眼鏡都科幻味濃，諸如Apple Vision Pro或Samsung Galaxy XR，惟縱然擁有N項功能，但大大部加上外型太Sci-Fi，坦白講小編就未見過人戴出街。VIVE Eagle首要任務，就係讓人願意戴出街，首先它外型跟一般眼鏡無異，採用半透明膠框並提供黑、灰、咖啡、紅四色，擺脫以往科技產品嘅「宅味」。

▲ 外型跟一般「黑超」無咩分別

▲ 共推出紅、咖、灰、黑四款配色，包括太陽眼鏡及抗藍光透明鏡片款式

另外它提供M、L兩個尺碼，機身輕至49g，同時搭配可調式鼻墊與符合亞洲人臉型的人體工學鏡架，戴足一日都唔會覺累贅。更貼心嘅係，佢嘅鏡腳設計預留空間，可以俾任何眼鏡舖師父隨意調整鬆緊、彎曲角度，同配一副普通眼鏡流程完全一樣。用家仲可以自行配上有度數嘅鏡片，近視、散光都無問題。出廠佢有ZEISS太陽鏡片及抗藍光透明鏡片兩個款式，同樣具有UV400防護，保護用家雙眼。

▲ 鏡腳預留空間，可以俾任何眼鏡舖師父隨意調整鬆緊、彎曲角度

▲ 搭配可調式鼻墊與符合亞洲人臉型的人體工學鏡架

▲ 外型看似簡單，但拆來由很多精細零件組成

作為AI眼鏡，智能體驗係靈魂。VIVE Eagle用上Google Gemini作為AI引擎，用家只需講「Hey VIVE」就能喚醒。最大亮點支援援普通話、英語等多國語言，預計2026年農曆新年後還會支援粵語，真正融入港人生活。AI功能方面相當實用，例如見到唔識嘅外文菜單，可以「即拍即譯」; 見到唔識嘅狗狗品種，開口問AI佢即時解答; 行街或運動時，也能用語音指令進行第一身拍照。另外用戶可以與AI連續對話，等佢幫你規劃行程、搜尋資訊或記錄生活，尤如私人助理一樣。

▲ 支援「即拍即譯」，結果仲可經VIVE Connect App實時看到

▲ 「即拍即譯」功能示範

▲ 支援普通話、英語對話，預計2026上半年支援粵語

AA

▲ 指令記錄儲存於VIVE Connect App內，並提供AI食譜、泊車提示、動物及藝術了解等多個功能，而AI語言及男女聲都有得調校

眼鏡左邊內置一枚1,200萬像素超廣角鏡頭，只需開口講句「Hey VIVE，拍照」或按下鏡腳實體鍵，就能以最第一人稱視角捕足眼前所見，做到所見即所拍。針對敏感嘅私隱問題，鏡腿右邊設有拍攝提示LED燈，未配戴或指示燈被遮擋即停用錄影功能，防止偷拍。

▲ 鏡腿右邊設有拍攝提示LED燈

▲ 按下鏡腳實體鍵，就能以最第一人稱視角捕足眼前所見

▲ 內置一枚1,200萬像素超廣角鏡頭

▲ 所拍相片會儲存於手機內，並可調校拍片長度及AI按鍵所對應功能

VIVE Eagle同時係一副開放式耳機，兩邊鏡腳均內置喇叭，支援播放音樂、接聽電話。右邊鏡腳更設有觸控板，可以滑動調節音量。實測嘈吵環境下聽歌依然清楚，雖有少許漏音但不算嚴重。此外，多得指向性麥克風與智慧環境噪音過濾技術，吵雜環境中也能清晰收音。

▲ 兩邊鏡腳都內置了喇叭

▲ 右邊鏡腳設有觸控板，可以滑動調節音量

VIVE Eagle內置235mAh 電池，日常待機最長可達36小時，連續聽音樂亦可使用4.5小時。支援邊充邊用的磁吸快充設計，10分鐘即可補充約50%電量，23分鐘可達80%電量，緊急情況下相當有用。

▲ 支援邊充邊用的磁吸快充設計，10 分鐘即可補充約50%電量

總結︰適合日常佩戴 一站式服務抵讚

一副VIVE Eagle，將AI助手、輕便相機、開放式耳機同太陽眼鏡融為一體，而且外型重量跟一般眼鏡無異，大大增加日常使用機會，整體上彌補了鏡片沒有畫面顯示這缺點。另外，HTC亦今次放棄傳統電器舖銷售，選擇與溥儀眼鏡等精品眼鏡行及電訊商1O1O、 csl、SmarTone合作，從試戴、驗光、購買到售後都係一站式，體驗會比買其他智能鏡頭來得體貼全面。

▲ 包裝都好有眼鏡盒Feel

VIVE Eagle即日開賣，建議售價為HK$3,988。凡購買VIVE Eagle將獲得價值HK$600的24個月的「VIVE AI Plus」服務，隨盒附贈VIVE Eagle 眼鏡盒。搭配1O1O、csl、SmarTone 5G 服務計劃，即可用專案優惠價格入手VIVE Eagle，另有溥儀HK$500配鏡優惠券。