Fender Audio MIX換件耳機︰一駁iPhone變靚聲﹖

美國傳奇結他品牌Fender踩過界，唔再淨係玩樂器，近日正式殺入競爭激烈嘅個人音響市場，推出品牌史上首款主動降噪頭戴藍牙耳機Fender Audio MIX。呢個喺音樂界叱咤超過70年、陪住無數神級樂手走過巔峰嘅名字，今次將佢嘅「美式音色DNA」一次過注入耳機之中。唔少行內人同樂迷都問：呢副索價近兩千銀嘅耳機，係情懷加持，定係真有料到？

▲ 備有Skyscraper Black都市黑及Olympic White奧林匹克白兩色。

講到Fender，你腦海一定會響起經典電結他嘅Crunch音色。今次這個副Audio MIX耳機，就標榜承傳呢份血統。佢用上40mm石墨烯單元，調音據講由Fender聲學團隊親自操刀，呈現所謂嘅「美式音效」：低頻飽滿彈牙，還原鼓同Bass嘅衝擊力；中頻人聲溫暖細膩，聽藍調爵士味道啱啱好；高頻就追求清澈唔刺耳。小編試聽，聲底有活力，聽Rock同流行曲感染力強，似將部經典Fender音箱戴喺頭上。

功能上，MIX最大賣點係提供多達四種連接方式，喺市場上較為罕見。除咗基本藍牙5.3同3.5mm有線，重支援USB-C數位有線連接。不過最「蠱惑」係，耳罩內竟然收藏咗一個FWD Tx USB-C無線發射器（Dongle）。

▲ 跟機送USB-C to 3.5mm及USB-C to USB-C兩條線材，並罕有地附送飛機轉插。

▲ 拆開耳罩就找到FWD Tx USB-C Dongle無線發射器。

呢個小配件對iPhone用戶嚟講堪稱神器。事關iPhone一向喺藍牙無損音訊傳輸上有限制，而家只要將個Dongle插入iPhone 15或更新型號嘅USB-C口，就可以解鎖24-bit/96kHz無損音質傳輸，音質超越CD標準。個Dongle仲有低於20ms嘅超低延遲模式打機用，以及Auracast模式同朋友分享音樂。

外觀上，Fender無將耳機設計到好「重搖滾味」，反而行簡約時尚路線，有「都市黑」同「奧林匹克白」兩款基本色。但佢玩嘅係模組化換殼概念。磁吸耳罩同頭帶都可以徒手拆換，官方話日後會推出更多顏色配件，等你可以自由配搭。今日想低調用黑色，聽日見客可以換白色襯西装，甚至玩撞色，完美演譯「Mix & Match」玩法。

▲ 耳罩可拆下，方便隨時轉色。

呢個設計背後仲有個「可持續」概念：耳罩、頭帶、電池呢啲易耗部件都可以單獨更換，唔使小小損壞就成副耳機報銷，變相延長產品壽命。品牌似乎想將耳機當成樂器一樣，成為可以長伴用家嘅夥伴。

▲ 模組化設計，耳罩、頭帶、電池呢啲易耗部件都可以單獨更換。

其他規格方面，MIX配備混合式主動降噪（Hybrid ANC）及通透模式，空間音效技術更帶來360度環繞聲體驗。另有雙麥克風配合環境噪音消除 (ENC) 技術改善通話水準，即使在鬧市裡講電話，對方也能清楚聽見用戶聲音。續航力亦相當誇張，關降噪最長可達100小時，開降噪亦有52小時，快充15分鐘可用8-14小時。以頭戴式降噪耳機嚟講，呢個續航力屬頂級水平。

▲ 機身上金屬操縱桿設計，讓用家可以自由控制音樂播放、音量。

耳機已喺香港接受預訂，官方零售價$2,380，而家早鳥優惠價$1,980。係指定渠道預訂，會額外送多一對原價$250嘅啡棕色磁吸耳罩。

▲ 送便攜袋一個。

記者點評：

Fender MIX耳機擺明唔係齋賣情懷，喺「連接自由度」同「外觀個人化」兩方面落重藥，尤其係個專治iPhone「無損跛腳」嘅Dongle，直擊痛點。模組化設計諗頭唔錯，兼賺埋環保形象。不過，最終能否喺Sony、Bose、Apple等巨頭壟斷嘅市場殺出血路，就要睇班結他迷同追求個性嘅玩家買唔買帳喇！

同場推出嘅，重有Fender Audio嘅ELIE 6及ELIE 12便攜藍牙喇叭系列，分別對應 60W 及 120W 輸出功率，支援多個音源輸入，例如藍牙 5.3、XLR/1/4" 組合輸入、兩個超低延遲無線頻道，最多可同時處理 4 個音源。喇叭可與另一隻 ELIE 系列喇叭配對成左右聲道，最多 100 隻 ELIE 同步播放，並提供 EQ 、混音及軟件升級等功能。 續航力方面，ELIE 6 及ELIE 12分別可播放18小時及15小時，快速充電 15 分鐘可使用 1.5 小時 及 2 小時。ELIE 6 及 ELIE 12 建議零售價分別為 $2,380 及 $3,280 。

▲ ELIE 12 (左) 及ELIE 6 (右)，同樣提供黑、白兩色。