Apple Watch SE 3實測：全面升級瞓覺都要戴住﹖

果迷等足3年，Apple終於再推高性價比智能手錶！全新Apple Watch SE 3雖然外觀「食老本」，但內在升級卻「落足料」，不僅搭載旗艦級S10晶片，更把常亮Retina屏幕、「雙指互點兩下」手勢操控等照搬過檔，再加上睡眠呼吸偵測、快充功能，觀乎定價絕對是「抵食夾大件」！以下為讀者拆解當中亮點，睇睇是否值得科水升級！

新款SE 3繼續提供40mm與44mm兩種尺寸，午夜色、星光色鋁金屬錶殼選擇，看似「換湯不換藥」。但最大驚喜是終於補齊歷代SE最大短板，搭載常亮Retina顯示器！待機時能以2nits低耗電模式持續顯示時間資訊，開會、上堂唔使特登抬手都睇到錶面，實用度即刻追貼旗艦型號。要知道呢個「永遠顯示」功能由Series 5開始已有，SE系列捱到第三代先有，果迷終於唔使再睇住黑屏發呆。

▲受測為40mm版本，鋁金屬錶殼渾圓輕巧，並提供橡膠、織布、不繡鋼多款錶帶選擇

▲配備第二代光學心率感測器及環境光線感應器

▲常亮屏幕待機時會會低光顯示，毋須提手就能看到時間及通知

今代改用與Series 11同級的S10晶片，64位元雙核心處理器配4核神經網絡引擎，儲存容量更豪爽加倍至64GB。實際操作體驗明顯快咗，無論係雙擊手勢操控、Siri語音指令定健康數據追蹤，反應都比舊版爽好多。最正係連同門高檔型號才有的「雙指互點兩下」手勢都移植過嚟，拇指和食指互點就接到電話、控制音樂，搭車逼地鐵時特別好用。不過要留意SE 3冇裝第二代超寬頻芯片，無法精準尋找iPhone 15以上機型，算係美中不足。

▲「雙指互點兩下」手勢示範

▲少了U2超寬頻晶片，只能靠響鈴聲尋找iPhone。

香港人工作壓力大，睡眠質素普遍差，今代SE 3新增「睡眠分數」功能。手錶會綜合心率、體溫、血氧等多項數據，按照國際睡眠研究標準生成量化評分，用家晨早起身一睇錶面就知自己瞓得好唔好。呢套演算法背後有超過500萬晚睡眠數據支持，趨勢分析仲可以同步到iPhone健康App，長期追蹤更見效果。

▲為睡眠打分，按按此給予極佳、高、普通、低、非常低等評級

▲以區間反映睡眠品質，深淺層睡眠時間一看便知

▲手錶還能綜合多天睡眠情況，得出維生指數水平

▲可經iPhone《健康》App了解更多睡眠數據

續航力維持18小時確實「唔夠驚喜」，每日一充走唔甩。但今代加入快充功能絕對係救命稻草，由零電量充到八成只需45分鐘，急住出門時叉15分鐘就頂到8個鐘使用時間。對於要24小時佩戴監測睡眠的用家來說，趁沖涼食飯時間快速補電就夠用一日，總算解決SE歷代最為人詬病的電力短命問題。

總結來說，今代SE 3以中階價錢打包多項旗艦功能，無論係首次入手智能手錶，還是用緊舊款Apple Watch想升級的用家，此代都稱得上係目前最「精明」的選擇。畢竟HK$1999入場費就有齊核心功能，仲想點？

▲健康功能仲有心率檢查、睡眠窒息通知、經期追蹤、排卵期回溯推算、手腕溫度追蹤等

▲支援多種運動模式，連最近大熱的匹克球都認得到